| कर्जत : प्रतिनिधी – महेंद्रकुमार भोसले
बीबीसीस्काय न्युज मराठीसाठी
पाटेवाडी (ता. कर्जत) येथे नवरात्रोत्सव मोठ्या उत्साहात आणि भक्तिमय वातावरणात गावातून साजरा करण्यात येत आहे. गावातील श्री भवानीमाता मंदिरात नवरात्रोत्सवानिमित्त विविध धार्मिक कार्यक्रमांचे आयोजन करण्यात आले असून, दररोज देवीची आरती, देवीची भक्तिगीते आणि महाप्रसादाचे आयोजन केले जात आहे. या उत्सवामुळे संपूर्ण गावात भक्तिमय वातावरण निर्माण झाले आहे.
पाटेवाडी येथील श्री भवानीमाता मंदिर हे गावातील पुरातन आणि ग्रामस्थांचे श्रद्धास्थान असलेले जागृत देवस्थान म्हणून ओळखले जाते. या देवीवर ग्रामस्थांची नितांत श्रद्धा असून, नवसाला पावणारी देवी अशीही भवानीमातेची ख्याती आहे. त्यामुळे नवरात्रोत्सवाच्या काळात मंदिरात दर्शनासाठी भाविकांची उपस्थिती पाहायला मिळत आहे. गावातील आबालवृद्ध, महिला आणि तरुण वर्ग या उत्सवात उत्स्फूर्तपणे सहभागी होत आहे.
नवरात्रोत्सवाचे औचित्य साधून मंदिराच्या रंगकामासह सुशोभीकरणाचे काम हाती घेण्यात आले आहे. गावातील तरुणांनी पुढाकार घेत ग्रामस्थांच्या सहकार्याने हे काम सुरू केले आहे. मंदिर परिसर अधिक आकर्षक आणि स्वच्छ ठेवण्यावरही भर दिला जात आहे. धार्मिक परंपरेचे जतन करण्याबरोबरच गावातील ऐक्य आणि सामाजिक बांधिलकी जपण्याचा प्रयत्न या माध्यमातून केला जात आहे.
या उत्सवाचे आणखी एक वैशिष्ट्य म्हणजे गावातील देवीभक्त आराधी महिलांकडून भवानीमातेची मनोभावे केली जाणारी सेवा. पारंपरिक धार्मिक विधी आणि भक्तिगीतांच्या माध्यमातून देवीची आराधना केली जात आहे. ज्येष्ठ नागरिकांचे मार्गदर्शन आणि तरुणांचे सक्रिय योगदान यामुळे उत्सवाचे नियोजन शिस्तबद्ध पद्धतीने केले जात आहे.
केवळ धार्मिक कार्यक्रमांपुरता उत्सव मर्यादित न ठेवता, गावातील विविध विकासकामे लोकसहभागातून पूर्ण करण्याचा संकल्पही ग्रामस्थांनी केला आहे. गावातील तरुणांनी एकत्र येऊन सामाजिक कार्यात पुढाकार घ्यावा, ज्येष्ठांच्या अनुभवाचा लाभ घ्यावा आणि गावाच्या विकासासाठी सामूहिक प्रयत्न करावेत, अशी भावना या उपक्रमातून व्यक्त होत आहे.
एकीकडे श्री भवानीमातेच्या भक्तीत तल्लीन झालेले ग्रामस्थ, तर दुसरीकडे मंदिर सुशोभीकरणासाठी एकजुटीने काम करणारे तरुण, असे चित्र सध्या पाटेवाडी गावात पाहायला मिळत आहे. धार्मिक श्रद्धा, परंपरा, सामाजिक एकोपा आणि लोकसहभागातून ग्रामविकासाची भावना यांचा सुंदर संगम या नवरात्रोत्सवाच्या निमित्ताने अनुभवायला मिळत आहे.