यवत पोलिस हद्दीत हरवलेले २५ मोबाईल पुन्हा मालकांच्या हाती यवत पोलिसांची उल्लेखनीय कामगिरी

| दौंड : प्रतिनिधी
  बीबीसीस्काय न्युज मराठीसाठी

तंत्रज्ञानाची प्रभावी साथ आणि पोलिसांची अथक मेहनतीमुळे यवत पोलिसांनी गहाळ झालेले तब्बल २५ महागडे स्मार्टफोन शोधून त्यांच्या मूळ मालकांच्या स्वाधीन केले. या मोबाईलची एकूण किंमत ५ लाख ७५ हजार रुपये असून, CEIR (Central Equipment Identity Register) पोर्टलच्या माध्यमातून ही उल्लेखनीय कामगिरी करण्यात आली.

पोलीस अधीक्षक संदीपसिंह गिल, अपर पोलीस अधीक्षक गणेश बिराजदार आणि उपविभागीय पोलीस अधिकारी बापुराव दडस यांच्या मार्गदर्शनाखाली यवत पोलीस स्टेशनचे पोलीस निरीक्षक संतोष तासगावकर यांनी गहाळ मोबाईलच्या वाढत्या तक्रारींची दखल घेत गुन्हे प्रकटीकरण पथकाला विशेष शोधमोहीम राबविण्याच्या सूचना दिल्या.

त्यानुसार पथकाने CEIR पोर्टलचा प्रभावी वापर करत महाराष्ट्रासह परराज्यातील मोबाईलधारकांशी सातत्याने संपर्क साधला. तांत्रिक तपास, माहितीचे विश्लेषण आणि सातत्यपूर्ण पाठपुरावा यांच्या बळावर २५ गहाळ स्मार्टफोन हस्तगत करण्यात यश आले. त्यानंतर हे सर्व मोबाईल त्यांच्या मूळ मालकांना परत करण्यात आले.

हरविलेला मोबाईल पुन्हा मिळाल्याने नागरिकांनी यवत पोलिसांचे मनापासून आभार मानले. यापुढेही गहाळ मोबाईल शोधून नागरिकांना परत मिळवून देण्यासाठी अशी मोहीम अधिक प्रभावीपणे सुरू राहणार असल्याची माहिती पोलीस निरीक्षक संतोष तासगावकर यांनी दिली.

ही कारवाई पोलीस अधीक्षक संदीपसिंह गिल, अपर पोलीस अधीक्षक गणेश बिराजदार, उपविभागीय पोलीस अधिकारी बापुराव दडस आणि पोलीस निरीक्षक संतोष तासगावकर यांच्या मार्गदर्शनाखाली गुन्हे प्रकटीकरण पथकाचे पोलीस उपनिरीक्षक मारोती मेतलवाड तसेच पोलीस अंमलदार महेंद्र चांदणे, संदीप देवकर, रॉकी देवकाते, मारुती बाराते, धीरज जाधव, अमोल भुजबळ, सचिन गुंड, शुभम मुळे आणि दिनेश पोळ यांनी यशस्वीरीत्या पार पाडली.